ရှားရှားပါးပါး အစ်ကိုတစ်ယောက်

ဒီပို့စ်လေးကိုမရေးခင် အရင်ဆုံးဝန်ခံချင်တာကတော့ ကျွန်မသည် အရမ်းစကားများပါတယ် ။ ပြီးတော့ တဖက်လူနားထောင်ချင်တယ် နားမထောင်ချင်ဘူး ဆိုတာတွေသိပ်ပြီး မခန့်မှန်းတတ်ပါဘူး ။ ဒီလိုအလိုက်မသိတဲ့ ဂုဏ်ပုဒ်တွေနဲ့ ကျွန်မမှာ ရိုးရှင်းတဲ့ အဖေမတူ အမေကွဲ အစ်ကိုတစ်ယောက်ရှိပါတယ် ။ ဒီတစ်ခါတော့ အဲဒီအစ်ကိုအကြောင်းပြောပြချင်ပါတယ် ။ သူကတော်တော်ကို အနေအထိုင် လျှို့ဝှက်ပါတယ် ။ သူ့ရဲ့ကြိုးစားမှု နဲ့ ပြန်ရတဲ့ အောင်မြင်မှု အပေါ်မှာလည်း မောက်မာခြင်းမရှိပါဘူး ။ ဒါပေမယ့် သူ့မှာအားနည်းချက်ရှိပါတယ် ။ သူ့ဘ၀ကို သူဘောင်ကန့်ထားပါတယ် ။ လောင်းရိပ်တစ်ခုရဲ့အောက်မှာ ကျေနပ်စွာဖြတ်သန်းနေပါတယ် ။ တကယ်တော့သူဟာ စိတ်လက်ပေါ့ပါးခဲ့ရင် အတွေးအခေါ်ကောင်းတွေ များစွာတွေးနိုင်သူပါ ။ သစ်လည်း ဒီအစ်ကိုရပြီးမှ တော်တော်ကိုသူ့လောင်းရိပ်တွေ မိလာခဲ့ပါတယ် ။ ဥပမာကွာ ကိုယ်အရင်ကနေထိုင်ပုံကို အကုန်လုံးမဟုတ်ရင်တောင် တစိတ်တပိုင်းပြောင်းလဲမိလာပါတယ် ။ စာဖတ်ပျင်းတဲ့သစ်သစ် အင်္ဂလိပ်စာအုပ်တွေကိုတောင် မပျင်းမရိ ဖတ်တတ်လာခဲ့ပါတယ် ။ ကြိုးစားပါ ညီမ ၊ ပိုက်ဆံစုနော် ဆိုတာကတော့ သူပြောနေကျလက်သုံးစကားပါ ။ သစ်အတွက်ကတော့ တကယ်ကို တန်ဖိုးရှိပါတယ် ။ လက်ဖွာတတ်တဲ့ သစ်သစ် တခုခု ၀ယ်မယ်ဆိုစဉ်းစားလာတတ်ပါတယ် ။ အင်္ဂလိပ်စာညံ့တဲ့ သစ်သစ် လိုလိုလားလားကို စာပြန်လုပ်တတ်ခဲ့ပါတယ် ။ ပြောင်းလဲခြင်းတွေဖြစ်နေတယ် ဆိုတာ သစ်ကိုယ်တိုင်သတိထားမိပေမယ့် ဒီပြောင်းလဲခြင်းက ကောင်းသောပြောင်းလဲခြင်း ဖြစ်လို့ ကိုယ်တိုင်လက်ခံမိပါတယ် ။ သစ်က နဂိုကတည်းက ပိတ်ရက်တွေ အပြင်မထွက်တဲ့သူဆိုတော့ ကိုယ့်ဘ၀ကို ဘောင်ခတ်တယ်လို့လဲ မမြင်ပါဘူး ။ သစ်ရဲ့အစ်ကိုဟာ သူချစ်တဲ့ချစ်သူလေးအပေါ်မှာ မပြောင်းလဲတဲ့ သံယောဇဉ်တွေနဲ့ တမ်းတနေပြီး သူ့ဘ၀ကိုတန်ဖိုးရှိစွာ ဖြတ်သန်းနေပါတယ် ။ သူအလုပ်တွေလုပ်နေလည်း သူ့အလုပ်ကိုမကျေနပ်ပါဘူး ။ သူလုပ်ချင်တာနဲ့ လုပ်နေရတာ တထပ်တည်းမကျတော့ တခါတလေ အလွန်စိတ်ရှုပ်နေတတ်ပါတယ် ။ သစ်ကတော့ ဒီအစ်ကိုပေါ့ပေါ့ပါးပါးရီတာ တစ်ခါလားပဲ တွေ့ဘူးပါတယ် နှစ်နှစ်ခြိုက်ခြိုက်ကို ရီလိုက်တာပါ မကြာပါဘူး ခဏလေးရယ်ပါ ။ ပျံတော့မယ့်စာကလေးကို ဓါတ်ပုံရိုက်တာ စာကလေးကပျံသွားတာကို သူရီလိုက်တာပါ ။ အပေါ်မှာပြောခဲ့သလိုပါပဲ သစ်သစ်က စကားများတော့ ပြောပြီဆို အစ်ကိုကနားထောင်သူလေ တစ်ခါတစ်လေဘာမှတောင် မပြောဘူး ငြိမ်နေတတ်တယ် ။ သစ်ကတော့ မနားတမ်းကိုပြောတာပါ ။ တနင်္ဂနွေလိုရက်မျိုးတွေလည်း အခန်းအောင်းပြီး စာဖတ်တတ်ပါသေးတယ် ။ ဖတ်တာကတော့ စာစုံပါပဲ ဘယ်အရာမှမသိတာ မရှိသလိုပဲ ။ တိတ်တဆိတ်နေတတ်တဲ့အစ်ကိုက ပေါက်ပေါက်ဖောက်တတ်တဲ့ ညီမကိုရတော့ တော်တော်စိတ်ညစ်မယ်ထင်ပါတယ် ။ အစ်ကို့ဘ၀က သူများနဲ့သိပ်မတူပါဘူး အချိုးအကွေ့များပါတယ် ဒီလိုအခက်အခဲတွေကြားကနေ အောင်မြင်လာတော့လဲ ကျေကျေနပ်နပ်ကြီး ပီတိဖြစ်စေချင်တာ သစ်ဆန္ဒပါ ။ ဆန္ဒ နဲ့ ဘ၀ အမြန်ဆုံး ထပ်တူကျပါစေလို့ ညီမဆုတောင်းပေးလိုက်ပါတယ် ။ ဒီပို့စ်လေးများ ယောင်မှားပြီးလာဖတ်ခဲ့ရင် အစ်ကိုရေ စိတ်မဆိုးကြေးနော် ......:P ။