စလုံးရောက်စ သစ်ဘ၀ ၃

ဒီလိုနဲ့ အင်တာဗျူးတွေသွား အလုပ်တွေလျှောက်နဲ့ သစ်သစ်တစ်ယောက် အလုပ်တစ်ခုက တနင်္လာနေ့ Spass တင်ပေးမယ် ဗုဒ္ဓဟူးနေ့လောက် ဖုန်းဆက်ပါဆိုတော့ အဲဒီနေ့ရောက်လို့ ဖုန်းဆက်တော့ သူတို့အဲဒီပရော့ဂျက်မရလို့ လူထပ်မခေါ်ဖြစ်တဲ့အတွက် မတင်ဖြစ်တော့ဘူးလို့ ပြောပြန်တယ် ။ အချိန်တွေကတော့ ၅ရက်လောက်ဆုံးသွားတာပေါ့နော် ပြန်ရဖို့ကလည်း ၁ပတ်လောက်ပဲလိုတော့တယ်ပေါ့ ။


ဒီလိုနဲ့ လာမည့် တနင်္ဂနွေဆို ကိုယ်ပြန်ရတော့မယ်လေ သောကြာသွားရမယ့် အင်တာဗျူးက ကိုယ့်ကိုတင်ပေးမယ်လို့ ပြောပါတယ် ။ ဒါနဲ့ပဲ တင်ချင်တင် မတင်ချင်နေ ရတယ်ဆိုပြန်လာမယ်ဆိုပြီး ပြည်တော်ပြန်သွားခဲ့ပါတယ် ။ ဒီလိုနဲ့ ရန်ကုန်မှာ ၃ပတ်နေပြီး စလုံးကတူမကဖုံးဆက်ပါတယ် Spass ကျပြီတဲ့ ပြန်လာမှလားတဲ့ အိုကေပေါ့ ပြန်လာဖို့လုပ်ရပြန်ရောပေါ့လေ ။ ဒီတစ်ခေါက်ပြန်လာတာကတော့ ပထမဆုံးကလာတာလောက် တက်ကြွမှုမရှိတာ သေချာတယ် ။ ပြန်ရောက်လို့ အလုပ်ဝင်ပါတယ် အလုပ်ကဒီဇိုင်းတွက်ရတဲ့အလုပ်ပါပဲ ဒါပေမယ့် ကိုယ့်ရှေ့ကလက်လွှဲမယ့်သူက ကိုယ်ဝင်တဲ့အချိန်မှာ မရှိတော့ပါဘူး ။ သူ့ပရောဂျက်မျိုးစုံကို ကိုယ်ကစကိုင်ရပါတယ် ဘာကဘယ်လိုစကိုင်ရမလဲ ဆိုတာတောင် မသိပါဘူး နဂိုရှိပြီးသား ဒီဇိုင်နာမတွေအားလုံးကလည်း စလုံးမတွေကြီးပါပဲ ဟိုသူကိုသွားမေးတော့လည်း ဟိုလိုလုပ် ဒီသူကိုသွားမေးတော့လည်း ဒီလိုလုပ်နဲ့ တော်တော်ကိုပညာပြတာ ခံရပါတယ် ။ ၉ရက်ပဲလုပ်ပြီး မလုပ်နိုင်တော့ပါဘူး ဒီလိုနဲ့ပဲ နောက်အလုပ်ထပ်ရှာဖြစ်တယ် ဆိုပါတော့လေ ...။

အဲဒီလို ရှာနေချိန်မှာပဲ အိမ်ပြောင်းဖို့ကဖြစ်လာပါတယ် အိမ်ရှင်က သူတို့သူငယ်ချင်းလင်မယား လာမှာမို့လို့ ၁ပတ်အတွင်းနေရာဖယ်ခိုင်းပါတယ် ။ သူငယ်ချင်းမြမွန်က သူ့ဆီမှာလာနေ အလုပ်ရမှ နီးတဲ့နေရာပြောင်းဆိုလို့ သူ့ဆီကိုရောက်သွားခဲ့ပါတယ် ။ အဲဒီအိမ်မှာစုနေကြတဲ့ သူတွေကလည်း သဘောကောင်းကြတယ်လေ ဒီလိုနဲ့ပဲ နောက်အလုပ်တစ်ခုရခဲ့တယ် ဆိုပါတော့ ။ နောက်အလုပ်က တကယ်ကိုထူးဆန်းပါတယ် အင်တာဗျူးသွားခါနီး ၀ပ်ဆိုဒ်မှာကြည့်လိုက်တော့ ကိုယ်နဲ့မအပ်စပ်တဲ့ ကုမ္ပဏီဖြစ်နေတော့မသွားတော့ဘူးလို့ စဉ်းစားလိုက်ပါတယ် သူငယ်ချင်းတစ်ယောက်က ဘာဖြစ်ဖြစ်သွားလိုက် နင်ပြန်ဖို့ပဲစဉ်းစားမနေနဲ့ဆိုတော့ သွားလိုက်မယ်ဆိုပြီး ရောက်သွားပါတယ် အင်တာဗျူးမှာ သူကပုံတွေချပြပါတယ် သိလားလို့မေးတယ် သစ်သစ်ကတော့ ခပ်တည်တည်ပါပဲ တစ်ခုမှမသိဘူးလို့ ဖြေလိုက်ပါတယ် ဒါပေမယ့် အဲဒီသူက မသိလည်းသင်ပေးမယ်ဆိုပြီး ခန့်ပါတယ် ။

ပြောရရင် အဲဒီစီနီယာက သစ်သစ်ကိုတော်တော်ကူညီပါတယ် ။ ဘာကဘယ်လိုဆိုပြီးတော့လည်း သင်ပြပါတယ် ။ ဒါပေမယ့် သိပ်မကြာပါဘူး စီနီယာနောက်အလုပ်သစ်ကိုပြောင်းသွားခဲ့ပါတယ် ။ သစ်သစ်အဲဒီမှာအလုပ်လုပ်နေတုန်း အလုပ်နဲ့နီးတဲ့ နေရာကိုပြောင်းခဲ့ပါတယ် ။ တော်တော်စိတ်ညစ်စရာကောင်းတဲ့အိမ်ပါပဲ သစ်နေရတဲ့အမကတော့ အရမ်းအေးပါတယ် သူကအဲဒီမှာနေတာ ၉လရှိပါပြီ ။ အိမ်ရှင် လင်မယားမှာ မိန်းမကတော်တော်ဆိုးပါတယ် လူမရှိရင် ကိုယ့်ကွန်ပျူတာတွေဝင်ဖွင့် အဲလိုလုပ်တတ်ပါတယ် ။ သူတို့မှာ သားလေးတစ်ယောက်ရှိပါတယ် လုံးဝကိုဆုံးမတာလည်း မရှိပါဘူး ။ သစ်တို့ပိတ်ရက်တွေမှာ အဲဒီကလေးက သစ်တို့အခန်းတံခါးကို ဂိုးတိုင်လုပ်ပြီး ဘောလုံးကန်တာလောက် စိတ်ညစ်စရာကောင်းတာ မရှိပါဘူး ။ ဒါနဲ့ပဲ ၂လလောက်နေပြီး သစ်အခုနေတဲ့ အခန်းလေးကိုပြောင်းလာခဲ့ပါတယ် ။

ဒီလိုနဲ့ ဒုတိယအလုပ်မှာ ၁နှစ်ခွဲလောက် ကြာပြီး အခုနောက်အလုပ်တစ်ခုပြောင်းလာခဲ့တာ ၅လတောင်ရှိခဲ့ပါပြီ ။ လှိုင်းကြမ်းလည်းမဟုတ် လေပြေလည်း မဟုတ်တဲ့ ဒီစလုံးမှာ ရောက်မှတော့ဆက်ပြီး ရုန်းရပေဦးမှာပေါ့လေ...။ ဘယ်အချိန်ပြန်မယ်ဆိုတာထက် ရောက်နေတဲ့နေရာမှာ ငါ့အတွက် ငါ့မိသားစု အတွက် တစ်ခုခုကျန်အောင် လုပ်မယ်ဆိုပြီး ပလန်လေးတွေချပြီး မဝေးတော့တဲ့တစ်နေ့မှာတော့ အမိမြေကိုပြန်ဖို့ ဆုံးဖြတ်ထားပါတယ် ။