ဒီနေ့ သစ်သစ်ငယ်စဉ်က အကြောင်းတွေထိုင်ရေးလိုက်ပါ ဦးမယ် ။ သစ်သစ်ငယ်ငယ်က ဆိုးတယ်ပြောမလား ကောင်းတယ်ပြောမလားတော့မသိဘူး အကြံကတော့ကြီးတယ်ဆိုပဲ အမေ့မှတ်ချက်ပေါ့ ။ သစ်သစ်ဘလော့လေးကို အစဉ်တစိုက်ဖတ်လာတဲ့ သူဆိုရင် သစ်သစ်အစ်ကို အစ်မတွေနဲ့ အရွယ်တော်တော်ကွာပြီးမှ လူဖြစ်လာတာကို သိကြမှာပါ ။ တပ်ထဲမှာနေခဲ့တဲ့ဘ၀တွေကို မသိတော့ပေမယ့် အရပ်ထဲကိုရောက်ပြီး ရပ်ကွက်ထဲမှာ ကဲခဲ့တာတွေတော့အားလုံးမှတ်မိနေပါသေးတယ် ။
သစ်သစ်ငယ်ငယ်က ထမင်း ဟင်းချက် ရောင်းတမ်းဆော့တာ သိပ်ဝါသနာပါတယ် ။ အိုးလေးတွေမှာ သဲထည့်ရေထည့် ထမင်းလုပ် အရွက်တွေလှီး ဟင်းတွေချက် ဆား အချိုမှုန့်ကို အမေမသိအောင် အိမ်နောက်ဖေးကတက်ခိုး တခါတလေဆို ဆီတောင်ပါသေးတယ် ... ဟိ ။ သစ်သစ်ငယ်ငယ်ကတော့ အိမ်က ဒရိုင်ဘာ စပယ်ယာတွေနဲ့ ဆော့ရပါတယ် ။ အိမ်မှာက ရန်ကုန်မထသလိုင်းကားလေးတွေ ထောင်ထားတော့ ဘယ်သူမှမရှိရင်တောင် သူတို့ရှိပါတယ် ။ သစ်သစ်ကဆိုင်ဖွင့် သူတို့ကိုရောင်းတယ်လေ ။ အရေးအခင်းဖြစ်တုန်းကဆို အိမ်အောက်တွေမှာ ကျင်းတွေတူးကြတယ်လေ သစ်သစ်က အဲ့ဒီကျင်းထဲမှာ အရွက်တွေနဲ့ဆော့ ရှယ်ပဲ...။ နောက် ၃တန်းလောက်ရောက်လာတော့ နည်းနည်းတိုးတက်လာတယ် အမေလစ်ရင် သူများအိမ်တွေမှာ သွားဆော့တယ် ။ ထမင်းမေ့ဟင်းမေ့လေ အမေက သစ်သစ်ရေ သစ်သစ်ရေ ဆိုပြီး လိုက်ခေါ် ကြားတဲ့နေရာကနေ ရှင်...လာပါပြီလို့ ပြန်အော်ပြီး လူကဘယ်တော့မှ ပြန်မလာဘူးတဲ့ ။ အိမ်မှာဘာချက်ချက်သူများအိမ်ကဟင်းပဲ စားချင်တယ်တဲ့ ဟိုအိမ်မှာဘာချက်တယ် ဒီအိမ်မှာဘာချက်တယ်နဲ့ ဂျီးလည်းများပါတယ်တဲ့ ။
နောက်၅တန်းလောက်ကျတော့ သစ်သစ်ကအဆင့်တက်လာတယ်လေ အိမ်နားမှာရှိတဲ့ကလေးမှန်သမျှကို ထိန်းတာလေ လိုက်ကိုထိန်းတာ ထိန်းပါရစေဆိုပြီးတော့ပေါ့ ။ စာတောင်မကျက်နိုင်လောက်အောင် လိုက်ထိန်းတာလေ အမေကအရမ်းဆူတာတော့ မှတ်မိတယ် သူများကလေး ကျိုးပဲ့ရင် ငါပြန်မမွေးပေးနိုင်ဘူး နင်ပဲလိုက်သွားဆိုပြီးတော့ ပြောတတ်တယ် ။ ၆တန်း ၇တန်းလောက်ရောက်တော့ ပဲများလာပြီလေ သစ်သစ်ကိုကြိုပို့ဖို့အမေခေါ်ထားတဲ့ ချင်းအမျိုးသားဒရိုင်ဘာကြီးကတော့ ပင်တိုင်ပေါ့ သစ်သစ်ကာရာအိုကေနဲ့ဆိုသမျှကို ထိုင်ကြည့်ရတာလေ ။ ဘယ်တော့မှထိုင်မဆိုပါဘူး ခုံတွေကိုဆင့်အဖေ့ပုဆိုးခင်း မိုက်ကိုကိုင်ပြီး ပိုးဒါလီသိန်းတန်သီချင်းတွေ ဆိုတာမှတ်မိသေးတယ် ။ ကားနားတဲ့အချိန်ဆို အခွင့်ကောင်းယူတာပေါ့ ပရိသတ်များတယ်လေ လည်ချောင်းနာအောင်ကို ဆိုတာလေ ကားပိုင်ရှင်သမီးဆိုတော့လည်း ဟုတ်ဟုတ်မဟုတ်ဟုတ် လက်ခုပ်တွေတီးရတာပေါ့လေ ... ရှက်ထှာ ။
နောက် ၈တန်းလောက်ရောက်တော့ အိမ်ကကားတွေက သံတောင်ကလိုင်ချီးသီးတွေကို ရန်ကုန်ကိုတိုက်ရိုက်အသယ်အပို့လုပ်တော့ သစ်သစ်ကကားနောက်အဖုံးဖွင့်ပြီး လိုင်ချီးသီးကိုလည်း စပယ်ယာတွေနဲ့အတူတူအော်ရောင်းတတ်ပါသေးတယ် ။ သစ်အမဆို ရှက်လွန်းလို့တခါမှဝင်မရောင်းဘူး ။ သစ်သစ်ကအထုတ်ထဲက ကြီးတာလေးဆိုအော်လည်းအော် ဖြုတ်လည်းဖြုတ် ပါးစပ်ထဲလဲထည့်ပေါ့လေ စားလိုက်သောက်လိုက်ရောင်းလိုက်ပေါ့ ။ ညရောက်ရင်အိပ်လိုက်တာဆိုတာ အစ်ကိုတွေကပြောတယ် ငါ့ညီမကမိုးလင်းပေါက်ကားမောင်းလာတဲ့ အစ်ကိုတွေထက်တောင် ပင်ပန်းသေးတာတဲ့ ။ လိုင်းကားလုပ်တော့သိတဲ့အတိုင်းပဲ ကားဝပ်ရှော့နဲ့မကင်းဘူးလေ အမေက၀ပ်ရှော့သွားရင် ထမင်းချိုင့်တွေနဲ့ သစ်သစ်ကိုပါခေါ်သွားတယ် ။ ဟိုလိုလုပ်ပါလား ဒီလိုလုပ်ပါလား ငါလည်းမလုပ်တတ်ဘူးက ပြောသလားမမေးနဲ့ ။
အပျော်ဆုံးအချိန်က ကျူရှင်သွားတဲ့အချိန်ပဲ လွယ်အိတ်ကိုနောက်ပစ်ပြီး ရပ်ကွက်အထဲကိုဝင်ပြီး သွားလိုက်တာ တလမ်းလုံးတုတ်တစ်ချောင်းနဲ့ သြဇာသီးအစေ့လိုက်ကောက်တာလေ ။ ဆရာမဆီရောက်ရင် ဘယ်လောက်ရလဲ ရေတွက်ရတာအမော ...။ ဗီဒီယိုရုံတွေက ရဲကိုကို လင်းဇာနည်ဇော်ကား ဆိုမှတ်လာတယ် တပတ်တကြိမ်ကျောင်းပိတ်ရင် အမေကအခွေငှားခိုင်းတယ်လေ ဒီအပတ်ငှားမှာကိုလည်း အနီးအနားကသူငယ်ချင်းတွေ ကြိုပြောထားတာ ပြမဲ့နေ့ဆိုအခွေငှားဖို့အိမ်ကထွက်ကတည်းက ၀င်ခေါ်တာလေ လာကြည့်ဖို့ကို အများကြီးနဲ့ကြည့် နေကြာစေ့တွေစား ဇီးထုတ်တွေစား သူတို့ပြန်တော့ သစ်သစ်ကအမှိုက်တွေလှည်းရတာလည်း မှတ်မိသေးတယ် ။ ငယ်ဘ၀တစ်စိတ်တစ်ဒေသလေးတွေ ချရေးလိုက်တာဘာပဲဖြစ်ဖြစ် ညစ်နေတာလေးတွေ လစ်သွားတယ် ။ နောက်များမှထပ်ပြီး ဆက်ရေးဦးမယ်နော် ။
ဆက်ဖတ်ချင်သေးရင်...
ပြန်ခေါက်လိုက်နော်...
